Ruhango: Abarimo abamotari biyemeje gukangurira abandi umuco w'isuku

kuri uyu wa kabiri  tariki 22 Gashyantare  2022, bamwe mu batuye  mu karere  ka  Ruhango , bahuriye  mu  gikorwa  cy'isuku mu  rwego  rwo  gukangurira  abatuye  aka karere, kurangwa  n'umuco  w'isuku nk'uko  ubukangurambaga  bwavugaga  ko isuku ari  ubuzima.

Kanyarwanda  Deogratias  umuyobozi  w'abamotari mu karere  ka  Ruhango , avuga  ko muri  rusange  ngo nta mumotari  ukwiye kurangwa  n'umwanda, kuko uwo ngo  nta  mugenzi  wamutega.Ibi  ngo  bituma  abamotari  bahora  bitwararika bakagira  isuku ,icyakora  ngo  bafite  n'inshingano  zo kuyikangurira  abandi. Agira ati '' Nta  mumotari  ufite umwanda  wabona  umugenzi twebwe bidusaba guhora  dusa neza, icyakora  tugomba  kuyikangurira  abandi  yaba  abagenzi  dutwaye  cyangwa  undi  wese  tubonye  usa nabi.''

Yankurije  Farida  umukuru  w'umudugudu  wa Mujyejuru mu kagari ka Nyamagana ,umurenge  wa Ruhango avuga  ko muri uyu mujyi wa Ruhango hari abaturage usanga  bafite umwanda, abandi ugasanga bagenda bajugunya  imyanda  aho babonye  hose.Uyu mukuru  w'umudugudu avuga  ko  bagiye  kurushaho  gukangurira abaturage  kugira  umuco  w'isuku .Ati ''wasangaga  abantu  bajugunya  imyanda  aho babonye  bose  kandi ubu  dufite  kompanyi  isigaye  iza  gutwara  imyanda mu ngo , ariko si bose bayigiyemo , ubwo  tugiye  kujya  duhura  buri wa kabiri , turizera  ko  abantu  bose  bazaba  bamaze  gusobanukirwa  n'isuku''.

Ku ruhande  rw'ubuyobozi  bw'akarere  ka Ruhango , Habarurema  Valens umuyobozi  wako , avuga  ko igitondo  cy'isuku  cyatangirijwe mu mujyi wa Ruhango  cyanabereye mu yindi mirenge  igize  aka karere , ndetse  ngo  bakaba  baniyemeje ko ari igikorwa kizajya  kiba  buri  wa kabiri  guhera  sa moya za mu gitondo, abaturage bagahura bagakora  isuku ariko ngo  ntibinarenza  sa tatu  kugira ngo  abaturage  bajye  mu mirimo yabo.  Agira ati '' Ubundi ini ibintu  bitatu  twifuza ku baturage , icya mbere  turifuza  ko agira  isuku ku mubiri we, akaba yambaye imyenda imeshe akarabye bigendanye  n'ubushobozi  bwe, icya  kabiri  turifuza  ko aho aba haba hasa neza ntituvuze  ngo bubake inzu  z'ibitangaza badafitiye ubushobozi, ariko ahaba habe hari isuku  hakubuye hateye utwatsi, inzu  ayikurungire ku dashoboye  kubona sima, icya gatatu  twifuza nuko aho abantu  birirwa aho bakorera bahagirire isuku, yaba mu nyubako za Leta , amabanki , ku mashuri, ku maduka aho bacururiza cyangwa mu isoko ,aho umuntu yirirwa habe hari isuku.''

usibye  kuba muri aka karere  hatangijwe  igitondo  cy'isuku , mu karere  ka  Ruhango  hasanzwe indi  gahunda  yo gukangurira abahatuye kugira isuku, no kugira imyumvire  iboneye izwi nka Ruhango ikeye.

iyi gahunda y'igitondo cy'isuku , yanabaye mu tundi  turere  tw'intara y'Amajyepfo.

Jeanne/heza.rw