Bugesera: Ntibatewe impungenge n’urukingo rwa covid-19 rurimo guhabwa abana

Bamwe mu babyeyi bo mu murenge  wa Gashora mu karere ka Bugesera, bavuga ko nta mpungenge bafite zo kuba abana babo barimo  gufata urukingo rwa Covid -19,  bakabishingira ko nabo bikingije kandi bakaba  nta  ngaruka  rwabagizeho.

Abana barimo  guhabwa urukingo rwa covid-19 rwo mu bwoko bwa Pfizer rufite umwihariko wo kuba rwarakorewe abana bato, ni rwo rurimo guhabwa abana bafite kuva ku myaka itanu kugeza kuri 11 ,bo mu karere ka Bugesera.

Kuri ubu mu murenge wa Gashora harimo gukingirwa abana bari mu ngo mbonezamikurire ,ababyeyi babo bavuga ko nta mpungege bafite kuri iyo gahunda kuko bahawe amakuru yose ajyanye n’izo nkingo.

Mukansanga Dative wo mu kagari ka Kagomasi  ni  umwe mu babyeyi bari baherekeje  abana kuza kwikingiza, avuga  ko  nta mpungenge  na nkeya afitiye urukingo  ruterwa umwana we, kuko ari uburyo  bwo kumwongerera ubudahangarwa.

Ati’’ Natwe  twarakingiwe kandi ntacyo  twabaye, twabonye  kwikingiza  byaradufashije kwirinda covid-19 kubera  ko twari twabonye ubudahangarwa.Rero nta bwoba namba  dufite ibikorerwa abana bacu ni ibyo kubagirira neza’’. 

Ibi kandi binemezwa na Domina Mukandagijimana , umuyobozi w’urugo mbonezamikurire rwa kagomasi ,uvuga ko ababyeyi  babyishimiye  kandi  bakitabira no  gukingiza  abana babo.

Ati’’ Twagiye tubasanga mu ngo tukabibabwira  ukabona  barabyishimiye  cyane bagahita babazana’’.

Habimana Landward  umuyobozi  w’ikigo nderabuzima  cya  Gashora, nawe yemeza ko ababyeyi babyumvise cyane, kuko niyo baje mu kagari gukingira usanga babakurikirana  mu kandi kagari.

Ati’’Ababyeyi  barabyumvise  cyane kubera  ko  tugenda  twimuka  tukava mu kagari kamwe tukajya mu kandi ariko usanga  badukurikirayo bazanye abana kuko bacikanwe.

Akomeza agira ati‘’Ikindi  cyatweretse  ko babyishimiye  n’uko hari  n’abumva  ko turimo gukingira  abana bo mu irerero ugasanga bazanye  n’abatarageza ku myaka dukingira, rero tubona rwose barabyakiriye neza’’.

Mu Murenge wa Gashora mu Karere ka Bugesera bateganya gukingira abana 942 babarizwa mu bigo mboneza mikurire 36 bigize uyu Murenge. Ni mu gihe  mu karere kose  ka Bugesera gukingira  abana  bigeze ku kigero cya 43%, kuko  mu bana  71570 bateganyijwe guhabwa uru rukingo bamaze gukingira  abana 30.442.

Habimana Landward umuyobozi w'ikigo nderabuzima  cya Gashora  avuga  ko muri uyu murenge  bateganya gukingira  abana 942

Umwe mu babyeyi avuga ko nta mpungenge  bafite zo kuba  abana babo barimo gukingirwa  covid-19

UWAMBAYINEMA Marie Jeanne /heza .rw