Kamonyi : Guhuza ubutaka byongereye umusaruro w'ibigori wiyongera.

Bamwe  mu bahinzi  y'ibigori  bo  mu murenge  wa  Gacurabwenge  , mu karere  ka  Kamonyi  bavuga ko  nyuma  y'uko batangiye  gahunda  yo  guhuza ubutaka umusaruro  wiyongereye  cyane , ugereranyije  n'uwo  bari  basanzwe  babona  mbere  y'uko  batangiye  iyi  gahunda.

urugero  ni abo  muri  koperative  Abadatezuka ba Kamonyi ,  imaze  imyaka itatu  yinjiye  mu butubuzi  bw'ibigori  none ubu ikaba  isigaye  yeza  .

Kamagaju  Eugenie umuyobozi  w'iyi  koperative  avuga  ko kuva  mu mwaka  wa 2019  aribwo batangiye  kubona  umusaruro  mwiza kandi  ushimishije , bitandukanye  no  myaka  ya  mbere. Agira ati '' Muri 2019 tugihinga  bisanzwe  twari  twejeje toni 18 icyo  gihe  umuhinzi  yabonaga  amafaranga 200 ku kilo, ariko uyu munsi  aho  dutangiriye  guhuza ubutaka  tukajya  mu butubuzi  tumaze  kugera  kuri toni ijana na  mirongo  ine  n'ibindi , ndetse  uyu mwaka  twahize  ko tuzeza  toni zirenga  200 kuko turimo kubaka  izindi  hangari  nshyashya  , izo  dufite zabuze  ubushobozi  bwo  kubyakira kuri ubu kandi  umuhinzi  aragurirwa  umusaruro  we  ku mafaranga 600 ku kilo''.

ibi binemezwa  na  Habiyaremye  Martin utuye  mu kagari  ka  Sheli umurenge wa  Rugalika  mu karere ka  Kamonyi  nawe uhinga  ibigori , uyu muhinzi  avuga  ko  guhuza  ubutaka  byongereye  umusaruro  kuko  ku ruhande  rwe  ngo yezaga  nk'ibiro  150  kuri  are imwe , none  ubu  ngo ukaba  warikubye  hafi incuro 3. Ati '' nezaga  ibiro  150 kuri  are  imwe uyu  munsi  ndimo kweza ibiro  400 kuri  ari  imwe , amafaranga  yariyongereye  nayo , guhuza  ubutaka  byatumye  umusaruro uba  mwinshi  cyane tumaze  imyaka itatu  tubikoze  ariko urabona  ko aribyo  byazamuye  abahinzi  cyane''.

Uzabakiriho  Jacqueline  ushinzwe  ubuhinzi  mu murenge  wa  Gacurabwenge ,  nawe  yemeza ko guhuza  ubutaka  byongereye  umusaruro  w'ibigori  muri  uyu murenge, ari  nayo  mpamvu  bakirimo no  gukangurira  abandi  bahinzi  guhuza ubutaka  cyane  cyane  abahinga  ku misozi.  Agira ati '' Guhuza ubutaka  twe  twabibonyemo inyungu  nyinshi , umusaruro uriyongera , abahinzi  bakabona  amahugurwa  menshi kandi  ahagije yo kubabwira uko bakoresha  neza inyongeramusaruro , imbuto  barazibona  kandi  bakazibona  neza  kandi  ku gihe kandi  umusaruro  ugenda  wiyongera uko umwaka  uje.''

Uzabakiriho  akomeza  avuga  ko kugeza  ubu  mu bishanga  ari  ho  bamaze  kwitabira  gahunda  yo  guhuza  ubutaka ariko ku bahinga  i musozi  bo ngo  ntibarabyitabira  cyane. Kuri  ubu  ngo  barateganya  kubona  umusaruro  ungana  na  toni enye kuri  hegitari uretse  ko ngo  bazanazirenza. Kuri  ubu  iyi koperative  Abadatezuka  ba  Kamonyi  ihinga  ibigori  kuri  hegitari  30 hakaba  hitezwe  umusaruro ungana  nibura  na toni120

UWAMBAYINEMA  Marie  Jeanne/heza.rw