Kamonyi: Abamamyi barabangamira imikorere y'ikusanyirizo

Bamwe  mu  borozi bo  mu karere ka  Kamonyi mu murenge wa Gacurabwenge, bahitamo  kugurisha amata mu bamamyi  aho kuyajyana  ku ikusanyirizo  bafite  muri uyu murenge, ibi ngo  bigira  ingaruka  ku mikorere  y'iri kusanyirizo  kuko  amata  baba  bagomba  kwakira  buri  munsi  batayagezaho , kuko  aba yagiye  agurishirizwa  hirya no hino  kuri za butike n'ahandi  bayacuruza.

Karangwa  Ephrem umwe  mu borozi  bari  muri  koperative  Amizero  y'aborozi  ari  nayo  icunga  ikusanyirizo  ry'amata rya Rugobagoba  riri  mu murenge wa  Gacurabwenge , avuga  ko hari  aborozi  bahitamo  kugurisha  amata  yabo  mu bamamyi , n'abayacuruza  hirya  no  hino  mu dusanteri  ngo bitwaje  ibiciro  aba akaba ari nabo  babangamiye imikorere  yaryo.  Agira ati ''hari  abo  usanga  bayagura n'abaturage , hari  abayajyana  kuri  za butike  na za resitora . Bitwaza ko babaha amafaranga 300 kuri  litiro , ariko urumva  ntaba  apimye ntaba ameze  neza ''.

Karangwa  akomeza avuga ko bifuza  ko iteka rya Minisitiri w'ubuhinzi  n'ubworozi  rigaragaza  ko  amata yose agomba gucuruzwa  yanyuze  ku ikusanyirizo, kugira  ngo  abe  yapimwe  ndetse  anameze neza atarimo  amazi . Iri  teka  ngo bitewe nuko  babona rikoze  neza  byatuma  amakusanyirizo  abona  amata  atunganya. Agira ati'' Abamamyi  ni benshi  hano  twegereye i Kigali na Muhanga  hari  abayajyana yo, ariko  aho bayagurisha  ababaha  amata  atari meza kuko ntaba yapimwe, twebwe hano  ku ikusanyirizo  turapima tukareba  ko nta mazi arimo cyangwa atabaye umubanji, ariko  bariya  bo  ntibapima urumva aho bayajyana abayanywa  banywa amata adafite ubuziranenge.''

uyu mworozi  kandi  avuga  ko  ubuke  bw'amata  bakira bubangamiye  igenamigambi ry'iri kusanyirizo  ngo kuko  nk'ibikorwa  bifuzaga  gukora  harimo gutunganya  ibikomoka ku mata nka za yawurute, foromaji n'ibindi  bitagerwaho  kubera  ubuke bw'amata.

Nahayo Sylvere  umuyobozi  w'akarere  ka  Kamonyi  avuga  ko  koko  muri  aka karere  hari ikibazo  cy'uko  amakusanyirizo  atabona  amata  ahagije yo kwakira, ariko  ngo baganiriye  n'abacunga  amakusanyirizo  bareba  uko  iki kibazo cyakemuka  maze  basanga  bagomba  kubahuriza  ku makoperative  kugira ngo amata ashobore  kugera  ku ikusanyirizo. Agira ati'' Amata  yizewe  ni  ayavuye  ku ikusanyirizo  nta  muntu  uzongera  gucuruza  amata  atayakuye  ku ikusanyirizo , kuko amata aba yamaze  gupimwa. Ikindi  nuko  aborozi  bagiye  mu makoperative  nibo bazajya bajya kuyifatira  bakayajyana  ku ikusanyirizo kugira ngo bice ka kajagari k'abacunda bayagurira mu nzira bakayajyana kuyacuruza atanapimwe''.

Kuri ubu umworozi ugurishije amata mu bamamyi  bamuha  amafaranga 300 kuri litiro imwe, ni mu gihe uyajyanye  ku ikusanyirizo  we  agurirwa ku mafaranga  200 naho  uje  kuyagura  ku ikusanyirizo  we  akishyura amafaranga 220 kuri litiro imwe. Iri  kusanyirizo  ry'amata  rya  Rugobagoba  ryatangiwe gucungwa  nakoperative  y'aborozi  Amizero y'aborozi,  kuva  mu mwaka  wa 2016, icyo gihe  ikaba  yari  ifite ubushobozi  bwo  kwakira  litiro  4000 ku munsi , ikaba yarakiraga  litiro  800 ku munsi. Kuri  ubu  rifite ubushobozi bwo kwakira  litiro 6000 ku munsi  ariko kugeza ubu  rikaba  ryakira  hagati ya  litiro  400 na 500 ku munsi.

UWAMBAYINEMA  Marie  Jeanne/heza.rw